ZORAM TODAY| Aizawl 1st June, 2024 (Sat): Vawiin khan Disaster Management & Rehabilitation Department chuan mipuite hnena hriattur  ngenna thu a chhuah a, zawm theuh turin mitin a beisei.

DM &R department chuan, Indian Meteorological Department, Ministry of Earth Sciences, Govt. of India-in thu a chhuah angin State dangte rualin Mizoramah pawh fur a lo intan ta a, ruah pawh tam tham tak sur thei reng dinhmunah kan lo ding ta a.

Chhiatna laka kan him theih nan chhung tinte mahni chenna ni leh a velte leimin theng palh thei a awm em tih uluk taka lo thlithlai reng turin kan inngen a, kan in bul hnaia tui luankawr te leh tuichhe paihna te tha lo lai a awm a nih chuan rang taka siam tha zel turin kan inngen bawk a ni. Tuichhe paihna leh inchung atanga tui khawh thlakna (drain pipe)-te mahni in bul lui kawr a thleng ngei ngei tur a ni a, in bul lei charah a tawp ringawt tur a ni lo.

Sawrkar Department tinte pawh a chunga sawi ang khian mahni Department building theuhte uluk taka lo thlithlai a lo enfiah reng turin kan inngen a ni.

Chhiatna thleng palh a harsatna tawkte chuan mahni District Emergency Operation Centre (DC Office) theuhte rang taka hriattir tura ngen kan ni, an ti.